Drejtoria për Hetimin e Krimeve Ekonomike dhe Korrupsionit (DHKEK), përmes rrugëve operative ka thënë se disa nga prodhuesit e produkteve të mishit, janë duke abuzuar me produktet me afat të skaduar, duke filluar nga shitja e tyre me çmim më të lirë, e deri te ripërpunimi i tyre dhe ofrimi për konsum te qytetarët.
Më datën 20 tetor 2023, në konsultim me Prokurorinë Themelore, është realizuar Plani Operativ në bashkëpunim me Inspektoratin e AUV-it, ku janë kontrolluar disa kompani, në tre vendndodhje të ndryshme Prishtinë, Pejë dhe Mitrovicë dhe është bërë kontrollimi i gjithë mallrave/produkteve dhe dokumentacionit përcjellës.
Nga kontrollet e ushtruara mësohet se janë gjetur rreth 2000 kg mish dhe produkte të mishit me afat të skaduar, ku një pjesë është asgjësuar, ndërsa një pjese iu janë marr mostrat për dërgim në laborator.
Pas inspektimit të ambjenteve, është përpiluar procesverbal mbi ecurinë e operacionit, ndërsa është iniciuar rasti “Prodhimi dhe vënia në qarkullim e artikujve të dëmshëm ushqimorë”, thuhet në një komunikatë për media të Policisë së Kosovës.
