Tre zyrtarë të policisë së Kosovës janë arrestuar në veri të vendit pasi dyshohen për krim të organizuar dhe keqpërdorim të detyrës.
Inspektorati Policor i Kosovës njoftoi sot në një komunikatë për shtyp se arrestimi i tre të dyshuarve (një toger policor, një rreshter dhe një zyrtar policor) është realizuar me urdhër të Prokurorisë Speciale me dyshimin se ata kanë kryer veprat penale “Krim i organizuar” dhe “Keqpërdorim i pozitës zyrtare.
Ky operacion është vazhdimësi e atij të zhvilluar në muajin maj të këtij viti të koduar me emrin “Kontrabanda”, ku u arrestuan 19 zyrtarë policor të dyshuar për keqpërdorim të pozitës zyrtare, krim të organizuar, kontrabandimit mallrash, marrje ryshfeti, dhënie ryshfeti etj.
Operacioni i muajit maj ishte i shtrirë në disa rajone të ndryshme, përfshirë komunat Zveçan, Zubin Potok, Leposaviç, Mitrovicë e Veriut, Mitrovicë e Jugut, Skënderaj dhe Drenas dhe në të u arrestuan edhe zyrtarë policor shqiptarë, serbë dhe boshnjakë.
Inspektorati Policor i Kosovës shtoi se që nga fillimi i operacionit në muajin maj të këtij viti, janë arrestuar 25 zyrtarë të saj./Opinion.al
