Milovan Bojoviç, ish-gjeneral i ushtrisë serbe, është lënë i lirë sot nga Gjykata e Apelit pasi ishte arrestuar duke kaluar ilegalisht kufirin me Kosovën pranë Podujevës.
Ndaj tij ishte caktuar masa e paraburgimit njëmujor vetëm për hyrje ilegale në Kosovë dhe vendimi që përmbys atë të Gjykatës Themelore është marrë duke u bazuar mbi gjendjen psikike të Bojoviç, e konfirmuar nga ekspertiza e Institutit të Psikiatrisë Forensike të Kosovës.
Pas vendimit të marrë, Gjykata e Apelit ka urdhëruar Policinë e Kosovës që ta dëbojë të pandehurin dhe ta dorëzojë atë tek Policia Kufitare e Serbisë.
Menjëherë pas arrestimit të Milovan Bojoviç, më 7 prill nga ana e Policisë së Kosovës, reagoi Këshilli për Mbrojtjen e të Drejtave të Njeriut në Prishtinë, që e akuzoi atë për krime lufte ndaj shqiptarëve.
Por, Gjykata Themelore në Prishtinë nuk ka pasur ndonjë aktakuzë për krime lufte ndaj tij dhe ka dhënë masën vetëm për kalim ilegal të kufirit.
