Dy persona kanë dëshmuar me detaje përballjen e frikshme në Vlorë me Dijar Xhemën, 29vjeçarin e arrestuar më 16 gusht për “veprime me qëllime terroriste”. Gjykata e Krimeve të Rënda vendosi shtrimin e të riut në psikiatri edhe pse Prokuroria kërkoi arrest me burg.
“Panorama” boton dy dëshmitë. Dëshmitari me iniciale F. D ka treguar për hetuesit se më 16 gusht, rreth orës 12:00, ka qenë në pjesën e jashtme të një lokali në Vlorë, dhe te dera e lokalit ka parë një person të moshës rreth 3035 vjeç, me flokë të qethura shkurt pak të rëna në pjesën e përparme, me mjekër, i veshur me një këmishë dhe me pantallona xhinse, i cili ishte ulur ne një tavolinë pak larg nga dera. “Kur po qëndroja te dera e lokalit ky personi ma bëri me shenjë që të ulesha me të në lokal, në fillim i thashë jo, por ky person ma bëri përsëri me dorë për t`ju afruar dhe unë u afrova me qëllim se mos ishte ndonjë i njohur dhe u ula ne tavolinë me të. Ky person filloi të fliste me një gjuhë që nuk e kuptova, u frikësova dhe u çova nga tavolina. Pasi u çova më kapi nga parakrahu i dorës së majtë dhe më goditi me grusht në fytyrë, unë u shkëputa nga ai dhe u futa ne lokal dhe i fola kamerierit të lokalit duke i thënë: “Kush është ky personi se më qëlloi, ke mundësi ta nxjerrësh jashtë”. Ndërkohë unë po mundohesha të largohesha në drejtimin tjetër të lokalit, pasi ka dhe një derë tjetër për të dalë, ky shtetas po më ndiqte nga pas. Unë kam dalë nga dera tjetër e lokalit dhe kam qëndruar ne pjesën e përparme, kurse shtetasi që qëlloi po më ndiqte, ndërsa unë kam hyrë prapë në lokal dhe konkretisht në banjën e lokalit ku po laja sytë. Në këtë moment më vjen përsëri nga mbrapa ky personi dhe goditi derën. Pasi shqeu derën më goditi përsëri në fytyrë me grusht dhe u largua, duke hipur në automjet të tipit “Audi A5”, me ngjyrë gri me targë kosovare. Me sa vura re, numrat e targës ishin 02300 KS dhe është larguar në drejtim të vendit të quajtur Kali i Trojës. SULMI NË MAKINË Shtetasi i dytë që është përballur me të riun nga Kosova, dëshmitari me iniciale N.I, ka treguar ngjarjen si më poshtë: “…rreth orës 13.00 po planifikoja të shkoja për drekë në Llogara me një kushëri. Në një moment kam ndaluar makinën dhe kam marrë në telefon kushëririn tim E.I, kur vura re një person, i cili po shikonte ne drejtim të makinës sime. Ai kishte një makinë tip ‘Audi A5’, ngjyrë gri me targa Kosove. Ai u afrua afër makinës sime ku unë isha në timon, kurse shoku im S.Z. ishte pasagjer. Autori i ngjarjes ishte i moshës rreth 35 vjeç rreth 185 cm i gjatë, trup i mbushur me pak mjekër dhe me flokë të rëna, mbante në kokë një palë syze të zeza. Pasi u afrua te dera e makinës në krahun tim të shoferit ai me tha: “A keni dëshirë të bëni një xhiro me mua, me makinën tuaj ose me makinën time”. Unë nuk e kuptova mirë nga dialekti kosovar që ai po fliste dhe i thashë “çfarë thua” por ai me tha përsëri: “A keni dëshire të bëni një xhiro me mua me makinën tuaj ose timen”. Unë i thashë se nuk mundem, pasi kam punë dhe jam me shokë për drekë. Ai përsëri insistoi duke më thënë a keni dëshirë dhe unë i thashë: Jo nuk kam asnjë mundësi. Pas kësaj bisede unë i thashë mirupafshim dhe nisa makinën. Pashë se ky person shkoi te makina e tij, e cila ishte rreth tri metra larg makinës sime pothuajse paralel dhe e ndezi. Unë u nisa menjëherë e shpejtova makinën dhe vura re nga pasqyrat e makinës se ai po vinte nga mbrapa me makinën e tij. Kam vazhduar rrugën në bulevard dhe kam vërejtur se ky person me makinën e tij “Audi A5” po më ndiqte e më pas më parakaloi dhe në vendin e quajtur “Kali i Trojes” ktheu makinën kryq përpara makinës sime pa shkuar te kryqëzimi i “Kalit të Trojës”. Unë ndalova makinën, pasi ky person më pengoi me makinën. Pasi ndaloi, ai doli nga makina e tij dhe m’u drejtua mua që isha në makinën time, ku kërkoi të hapte derën time nga jashtë. Unë e ula xhamin rreth 10 cm dhe i thashë “çfarë ke”. Ai futi duart te xhami i hapur i makinës dhe kërkonte të hapte makinën nga brenda. Unë ia kapa duart dhe ia nxora jashtë xhamit me forcë.
Në këtë moment që unë ia largova duart, ai qëlloi makinën time me grusht te traversa sipër derës. Pasi këtij veprimi ai menjëherë hapi përsëri krahun dhe me sa fuqi kishte qëlloi xhamin e makinës sime në momentin që unë po e mbyllja atë. U godit xhami i makinës sime dhe dora i rrëshqiti deri te traversa e sipërme e derës. Në këtë moment, unë kam ndezur makinën dhe u nisa nga pas, pra, për të ardhur indietro me qëllim që të shmangia makinën e tij. Në këtë moment, kam vënë re punonjës policie si dhe automjet policie, të cilët erdhën ne vend dhe bënë shoqërimin e këtij personi”. / Panorama.al Trazhgim Sokolaj
