Parlamenti i Kosovës ka miratuar me 74 vota pro një projektrezolutë për të pezulluar me 1 muaj lojërat e fatit. Gjatë kësaj kohe, do të përgatitet edhe projektligji që do t’i ndalojë lojërat e fatit për një periudhë dhjetë vjeçare.
Ky vendim vjen pasi në javën e fundit, dy persona u vranë brenda kazinove në Kosovë. Në këtë mënyrë, Kosova po ndjek shembullin e Shqipërisë në ndalimin e lojërave të fatit, ndërsa kjo gjë pritet të sjellë probleme edhe për ato kompani bastesh që janë transferuar nga Shqipëria në Kosovë për t’iu shmangur ligjit.
“Qeveria brenda 30 ditësh të sjellë në Kuvend ligjin e ri që i ndalon të gjitha llojet e lojërave të fatit për një periudhë 10-vjeçare”, tha kreu i grupit parlamentar të Lidhjes Demokratike të Kosovës, Avdullah Hoti, teksa lexoi tekstin e rezolutës.
Kryeministri i Kosovës, Ramush Haradinaj, më herët gjatë ditës, përmes një postimi në Facebook i ofroi mbështetje rezolutës së deputetëve të Kosovës, duke thënë se ai ka kërkuar “inicimin e procedurave të nevojshme brenda ekzekutivit, të cilat do të rezultonin me mbylljen dhe pezullimin e aktiviteteve të kazinove dhe lojërave të fatit”./Opinion.al
