Kryeministri i Kosovës, Avdullah Hoti, ka bërë të ditur se semestri dimëror i këtij viti shkollor do të përfundojë më herët se sa është parashikuar në kalendarin e Ministrisë së Arsimit, Shkencës dhe Teknologjisë.
Në një konferencë për mediat, Hoti njoftoi se shkollat do të mbyllen më 18 dhjetor për t’u rihapur një muaj më vonë, më 18 janar.
“Ky gjysmëvjetor do të përfundojë më datë 18 dhjetor. I lus shkollat e komunat që t’i mbyllin tashmë punët sa i përket këtij gjysmëvjetori të vitit shkollor. Shkollat do të hapen me 18 janar. Një muaj do të jetë pushim dimëror”, tha Hoti në konferencë.
Ai bëri të ditur gjithashtu se ditët e vonuara do të zëvendësohen në muajin qershor.
Gjatë konferencës për mediat ka thënë se gjendja sa i përket përballjes me COVID-19 në Kosovë është mjaft serioze, por sipas tij është nën kontroll.
“Gjendja është mjaft serioze, por është nën kontroll dhe institucionet përkatëse janë duke e bërë punën e vet. Në bazë të vlerësimit të Institutit, praktikisht ne e kemi vendosur nën kontroll zgjerimin më tutje të pandemisë”, tha Hoti./Opinion.al
