Instituti Kombëtar i Shëndetësisë Publike të Kosovës dhe Komiteti për Monitorimin e Sëmundjeve Ngjitëse i Ministrisë së Shëndetësisë, kanë kërkuar të hënën ndryshim të strategjisë së testimit për personat që dyshohet se mund të jenë prekur nga koronavirusi i ri.
Në një rekomandim të siguruar nga Radio Evropa e Lirë, autoritetet shëndetësore kosovare thonë se si pasojë e kapaciteteve të kufizuara laboratorike për testim të çdo kontakti eventual të të infektuarve dhe rritjes së numrit të rasteve të prekura me sëmundjen Covid-19, që shkakton koronavirusi, testimi tani e tutje të bëhet vetëm për:
-pacientët me infeksion akut të traktit respirator ose humbje e shqisës së nuhatjes apo shijes
-ata që kanë histori udhëtimi ose vendbanimi në një vend/zonë, ku ka pasur vatra të rasteve ose përhapje në komunitet gjatë 14 ditëve para fillimit të simptomave,
-personat që kanë kontakt të ngushtë me rast të konfirmuar ose të mundshëm me Covid-19, në 14 ditët e fundit,
– personat që kërkojnë hospitalizim apo
-personat që janë banorë apo anëtar të stafit në një institucion rezidencial për personat e ndjeshëm, në 14 ditët para fillimit të simptomave.
Ministria e Shëndetësisë ka reaguar ndërkohë, duke hedhur poshtë raportimet se nga dita e hënë do të ndalohen testimet për rastet e kontaktit me personat e infektuar me Covid-19./Opinion.al
