Deklarata Presidentit të Kroacisë Zoran Milanovic se Kosova ka qenë pjesë e Serbisë dhe se është aneksuar nga ndërkombëtarët ka ngjallur reagime të forta në çdo vend ku jetojnë shqiptarë.
Por, kjo deklaratë është mirëpritur nga mediat serbe pranë Presidentit të Serbisë Aleksandar Vuçiç, të cilin e kanë cilësuar Milanoviçin “vëlla serb”.
“Bravo vëlla serb, gëzuar, Zoki ti je i yni”. janë disa komente në titujt e këtyre mediave.
Presidenti i Kroacisë, Zoran Milanoviç ka mbajtur një konferencë për media në Petrinja, nga ku foli për luftën në Ukrainë, duke u shprehur kundër dërgimit të armëve atje.
Ndër tjera, ai gjeti shkas të flasë edhe për Kosovën, duke thënë se ajo u aneksua nga bashkësia ndërkombëtare. Tani, sipas Milanoviçit, Rusia po e bën të njëjtën në Ukrainë, raporton agjencia kroate e lajmeve, Index.
“Kosova është rrëmbyer nga Serbia. Kosova është marrë nga Serbia, a është kështu? A e kemi njohur Kosovën, po e kemi njohur. Unë jam prapa Kosovës, por pasi kjo është bërë njëherë aneksimi, pra pa vullnetin e shtetit të Serbisë, të cilës Kosova i ka takuar e kjo ka qenë Serbia, respektivisht Jugosllavia, e cila për ne nuk është shtet mik dhe as që jemi brengosur për ta, ka qenë vetëm çështje kohe se kur Rusia apo dikush tjetër do të bëjë të njëjtën dhe kjo tani po ndodh”, ka thënë Milanovic.
Presidenti kroat vazhdoi më tej dhe dikur tha se “nuk është në pyetje kontestimi i Kosovës”.
