Qeveria e Kosovës është duke bërë përgatitjet e fundit për të kthyer në Kosovë rreth 100 kosovarë të tjerë të cilët gjenden në Siri, tha Ministri i Punëve të Brendshme, Ekrem Mustafa për Radion Evropa e Lirë.
Ministri në detyrë, Mustafa, tha se nuk mund të japë më shumë detaje, por aktualisht po zhvillohen bisedime me Turqinë rreth kthimit të këtyre personave.
Ministri Mustafa pohoi se institucionet kanë informacione për personat që gjendën në Siri dhe që pritet të kthehen në Kosovë. Sipas tij, në këtë grup ka më shumë luftëtarë në dallim me operacionin e parë të realizuar në muajin prill, përmes së cilit në Kosovë ishin kthyer vetëm katër luftëtarë.
“Në detaje nuk mund të prononcohem. Por, tani jemi shumë të interesuar me shtetin turk, mos ndonjë nga personat (kosovarët) që kanë qenë nëpër kampe ka kaluar në pjesën turke. Përafërsisht dihet numri, por nuk është numër i madh tani, sepse 110 i kemi sjellë në Kosovë. Aty diku sillet edhe numri i personave të tjerë (që pritet të kthehen). “Në kontingjentin e dytë ka më shumë persona që kanë marrë pjesë në luftë, por megjithatë më shumë ka fëmijë dhe gra”, tha Mustafa.
Mustafa tha se njësoj si në opracionin e kaluar Kosova merr përgjegjësinë e integrimit, transferimit, të mbajtjes 72 orësh dhe transferimit nëpër vendbanimet e të kthyerve, duke shtuar se ka dhe një fond të posaçëm vetëm për këtë problematikë.
“Sikurse që ka qenë i kaluari. Do të thotë ne e marrim përgjegjësinë e integrimit, transferimit, të mbajtjes 72 orësh, transferimit nëpër vendbanimet e tyre. Nëse ka persona që nuk kanë vendqëndrim të përhershëm, për shembull nëpër familjarë ose diku, ju organizojmë edhe vendbanim të përhershëm. Është një fond i posaçëm që është i destinuar vetëm për këtë problematikë”, thotë Mustafa.
Kujtojmë se në muajin prill të këtij viti, institucionet kthyen në Kosovë 110 kosovarë, në mesin e tyre katër luftëtarë që ishin pjesë e organizatave terroriste në Siri, 32 gra dhe 74 fëmijë. Kthimi i tyre u bë përmes ndihmës së ofruar nga Shtetet e Bashkuara të Amerikës.
Ndërkaq Shqipëria nuk ka bërë ende asnjë hap konkret në këtë drejtim. Rasti që tronditi opinionin shqiptar dhe atë italian, ai i vogëlushit Alvin ngriti debate lidhur me çështjen por akoma nuk dihet fati i tij apo shqiptarëve të tjerë që ndodhen në Siri.
Megjithatë ditën e djeshme, Elisa Spiropali, ministrja e Shtetit për Marrëdhëniet me Parlamentin ka deklaruar se qeveria është duke bërë gjithçka është e mundur për të kthyer fillimisht gratë dhe fëmijët, por pa dhënë më shumë detaje, të cilat do të rrezikonin operacionin.
“.I kemi kushtuar vëmendje të veçantë luftëtarëve shqiptarë që kanë marrë pjesë në konflikt. Situata në Siri është tejet e komplikuar. Shqiptarët kanë kaluar kufijtë në mënyrë të paligjshme, ndërsa kanë ndryshuar edhe emrat, duke e bërë të vështirë identifikimin. Shqipëria është duke bërë gjithçka është e mundur për të kthyer fillimisht gratë dhe fëmijët. Hapat e ndërmarrë nuk mund të bëhen publike, pasi do të ishte e papërgjegjshme, pasi do të vinte në rrezik operacionin. Duke zbuluar identitetin e tyre i ekspozojmë përpara një rreziku vdekjeprurës. Për pasoja do u lutesha mos të kompromentojmë situatën dhe jetën e personave që po përpiqemi ti shpëtojmë. Ju garantojmë se institucionet e përfshirë po bëjnë detyrën me profesionalizëm pa zhurmë dhe bujë. Aktualisht një grup operacional po vendos kontaktet në terren për të mundësuar riatdhesimin e shtetasve shqiptarë. Në këtë situatë konflikti në tërren dua të theksoj rrezikun që kanoset nga publikimi i të dhënave të këtyre personave shpesh herë edhe me fytyra. Ka një komunikim me ta të vazhduar. Përpjekjet tona për të riatdhesuar Alvinin dhe të tjerë vazhdojnë edhe sot. Pra nuk mungon vullneti por konteksti i posaçëm që ata shtetas ndodhen”, tha Spiropali./ Opinion.al
