Kryedemokrati Sali Berisha ka uruar Lëvizjen Vetëvendosje për fitoren në zgjedhjet parlamentare të Kosovës. Berisha gjithashtu uron qytetarët, forcat politike, drejtuesit dhe të zgjedhurit e Kosovës si dhe administruesit e procesit, të cilin e quan “dinjitoz që nderon lirinë e votë dhe demokracinë”.
Përmes një postimi në rrjetin social “Facebook”, kreu i demokratëve shkruan se votimi, administrimi i procesit dhe dalja e rezultatit ishin një model frymëzimi.
“Kosova votoi! Kosova frymëzon! Të dashur miq, qytetarët e Kosovës votuan dje në zgjedhjet e përgjithshme parlamentare për përfaqësuesit e tyre. Votimi, administrimi i procesit dhe dalja e rezultatit ishin një model frymëzimi.
Në zgjedhjet e djeshme, Partia e Vetëvendosjes mori 41% të votave, Partia Demokratike e Kosovës mori 22,16% të votave, Lidhja Demokratike e Kosovës mori 17,60% të votave. Koalicioni Aleanca për Ardhmërinë e Kosovës, Nisma Socialdemokrate, Konservatorët dhe Intelektualët mori 7,46%, Lista Serbe 4,43% dhe Koalicioni për Familjen 2,26%.
Me këtë rast uroj përzemërsisht qytetarët, forcat politike, drejtuesit dhe të zgjedhurit e Kosovës, si dhe administruesit e këtij procesi dinjitoz, që nderon lirinë e votës dhe demokracinë. Gjithashtu, uroj fituesin e këtyre zgjedhjeve, Lëvizjen Vetëvendosja”, shkruan Berisha.
