Tenisti i njohur ndërkombëtar Novak Gjokoviç ka ngritur një polemikë politike në French Open pasi shkroi një mesazh për Kosovën pas fitores së tij ditën e hënë.
“Kosova është zemra e Serbisë. Ndaloni dhunën,” shkroi 22 herë kampioni i Grand Slam Gjokoviç në lentet e kamerave në serbisht.
Rreth 25 ushtarë paqeruajtës të NATO-s që mbronin tri komuna në veri të Kosovës u plagosën në përleshjet me protestuesit serbë të hënën, ndërsa presidenti i Serbisë e vendosi ushtrinë në nivelin më të lartë të gatishmërisë luftarake.
Incidentet erdhën një ditë pasi shefi i NATO-s Jens Stoltenberg i bëri thirrje Kosovës që të ulë tensionet me Serbinë pas përleshjeve midis policisë kosovare dhe protestuesve që janë kundër marrjes së detyrës së kryebashkiakëve shqiptarë në zonat etnike serbe.
Presidenti serb Aleksandër Vuçiç tha se të hënën janë plagosur 52 serbë, tre prej tyre rëndë, ndërsa presidentja e Kosovës Vjosa Osmani ka akuzuar homologun e tij serb për destabilizimin e Kosovës.
Serbia dhe aleati i saj tradicional Rusia nuk e njohin pavarësinë e Kosovës dhe Moska ka bllokuar ofertën e vendit për t’u bërë anëtare e Kombeve të Bashkuara. Serbia ende e konsideron Kosovën pjesë të territorit të saj.
“Kosova është djepi ynë, fortesa jonë, qendra e gjërave më të rëndësishme të vendit tonë. Ka shumë arsye pse e shkrova atë në kamera”, tha Djokoviç për mediat serbe.
Federata franceze e tenisit, e cila organizon eventin i tha Reuters se aktualisht nuk ka rregulla zyrtare për çfarë duhet të thonë apo jo lojtarët.
“Nuk ka rregulla zyrtare të Grand Slam-it për atë që lojtarët mund ose nuk mund të thonë. FFT nuk do të bëjë asnjë deklaratë ose nuk do të mbajë asnjë qëndrim për këtë çështje,” i tha Reuters federata franceze e tenisit (FFT), e cila organizon ngjarjen.
Pas këtyre deklaratave, në Rahovec të Kosovës gjatë natës është shkatërruar një murale për tenistin. Fytyra e Djokoviç ishte shkarravitur ndërsa në krah ishte shënuar UÇK (Ushtria Çlirimtare e Kosovës).
Familja Djokoviç është e njohur për precedentë të tillë. Në Australian Open tenisti u detyrua të mbrojë të atin pas një video ku ai shfaqej me një flamur rus pavarësisht luftës në Ukrainë./Opinion.al
