Departamenti i Shtetit Amerikan ka reaguar lidhur me deklaratën e shtetit të Kosovës, për tu ofruar mbrojtje të përkohshme 50 emigrantëve të ardhur nga vendet e treta, në kuadër të bashkëpunimit me Shtetet e Bashkuara
Në një deklaratë për CBS News, DASH ka vlerësuar bashkëpunimin me Kosovën në kuadër të një prej prioriteteve kyçe të administratës Trump.
Sipas DASH, do të dërgohen së shpejti emigrantë nga SHBA derisa këta të fundit të kthehen në vendet e origjinës. Më tej në deklaratë, theksohet edhe mirënjohja ndaj Kosovës për rolin e saj në këtë proces.
“Jemi mirënjohës partnerit tonë, Kosovës, për pranimin e shtetasve të vendeve të treta të larguar nga Shtetet e Bashkuara dhe për lehtësimin e kthimit të sigurt të këtyre personave në vendet e tyre të origjinës.”
Ky reagim vjen pasi Kosova ka shprehur gatishmërinë për të strehuar përkohësisht deri në 50 persona të tillë, si pjesë e një bashkëpunimi të ngushtë me Shtetet e Bashkuara të Amerikës. Vendimi për këtë është miratuar nga Qeveria e Kosovës më 11 qershor 2025.
