Kryeministri i Kosovës Avdullah Hoti, tha në një konferencë për media të dielën se do te fillojë një zbatim shumë rigoroz i masave ekzistuese kundër përhapjes së koronavirusit.
Hoti ka thënë se me rritjen e numrit të rasteve me Covid-19 gjendja është rënduar shumë.
“Në bazë të shifrave gjendja po rendohet dhe jemi gati në limitet e kapaciteteve shëndetësore dhe jemi duke e bërë të pamundurën. Në javët e fundit ne kemi marr një numër të madh të masave për të përgatitur për valën e dytë dhe për vjeshtë dhe duke ri-organizuar komplet shërbimin spitalor dhe duke nisur procedurat për blerjen e testeve shtesë”.
I pari i qeverisë theksoi se pas mbledhjes së këshillit të sigurisë një pjesë e madhe janë pajtuar që të vazhdojnë ndërmarrjen e masave shtesë por duke mos përjashtuar gjendjen e jashtëzakonshme.
“Në tre ditët kemi shqyrtuar masat e reja. Unë kam zhvilluar konsultime me të gjitha grupet e interesit. Sapo i kryejmë edhe mbledhjen e këshillit të sigurisë së Kosovës ku ka një pajtueshmëri të përgjithshme që të shkojmë përpara me ndërmarrjen e masave shtesë dhe të përcjellim situatën duke mos përjashtuar ndjekjen e procedurave për shpallje të jashtëzakonshme. Ministria e Financave ka dhënë në dispozicion 9.2 milionë euro për të blerë gjërat e nevojshme”.
Hoti ka bërë të ditur se do të ndalohen tubimet publike dhe ritet fetare.
“Masat që do të prezantohen sot do të jenë më efekteve se ato që kemi marr më herët. Do të ketë gjoba për ata që nuk i respektojnë vendimet dhe nuk do të ketë tolerime. Po ashtu ti obligojmë institucionet që të kenë dezinfektues dhe të ndalohen tubimet publike dhe ritet fetare deri sa të bëhet një rishikim tjetër”.
Ashpërsimi i masave për parandalimin e përhapjes së korinavirusit pason pas rritjes së numrit të rasteve me koronavirus në tre javët e fundit.
Vetëm gjatë tre ditëve të fundit, në Kosovë janë shënuar 615 raste me COVID-19 pozitiv.
Ndërkaq, numri i përgjithshëm i të infektuarve deri të shtunën ka arritur në 4.715 nga 27.723 teste të bëra. Ndërsa janë shënuar 101 raste të vdekjeve./ Opinion.al
