Gjatë kohës që po mbahej seanca gjyqësore në ngarkim të zyrtarëve të bashkisë së Bulqizës, trupës gjykuese nuk i ra në sy mungesa e njërit prej të pandehurve që SPAK tha se është arrestuar.
Bëhet fjalë për Leonard Daçin, sekretar i përgjithshëm i bashkisë, njëkohësisht dhe anëtar i Komisionit të Vlerësimit të Ofertave.
Ai u shfaq befasisht, nga hyrja e publikut i shoqëruar me avokatin e tij dhe jo nga kafazi i të pandehurve. I pyetur nga gjykata, Daçi u shpreh se është një prej të pandehurve.
Gjatë kësaj kohe, ai tha se dëgjoi emrin e tij që përmendej në media si një nga të arrestuarit, por në fakt ndodhej në Tiranë. Daçi mësohet se njoftoi avokatin duke i kërkuar mendim, i cili i sugjeroi të paraqitej në gjykatë.
Pavarësisht se mbërriti përballë togave të zeza, procesi ndaj Daçit nuk u zhvillua, por do të bëhet në ditët në vijim, dhe do të qëndrojë i paraburgosur në ambientet e policisë, ndryshe nga kolegët e tij që u transferuan në burg. Avokati i tij mbrojtës tha se klienti i tij është i pafajshëm.
Në seancë, edhe nënkryetarja Enkelejda Lleshi mohoi akuzat. Gjatë diskutimeve u zbulua se nr.2 i bashkisë më herët kishte dhënë dorëheqjen pasi nuk donte të përfshihej në firmosjen e tenderave, por që më pas ishte bindur të rikthehej./ Klan News
