Politika në Kosovë dhe Serbi po zien për të arritur një marrëveshje përfundimtare, e cila do të përfshinte korrigjimin e kufijve mes dy vendeve. Por qytetarët, si shqiptarë të Kosovës dhe ata serbë nuk e pranojnë një gjë të tillë.
Ky është përfundimi i një sondazhi “Zëri i Popullit rreth ‘Finales së Madhe’ ndërmjet Kosovës dhe Serbisë”, i bërë nga Instituti Kërkimor për Çështje Evropiane dhe të Zhvillimit.
Numri i të anketuarve është 1110 (90% shqiptarë, 9% serbë dhe 1% nga grupet e tjera etnike) dhe është realizuar në 7 rajonet kryesore në Kosovë: Prishtinë, Ferizaj, Gjilan, Prizren, Pejë, Gjakovë dhe Mitrovicë (Veri dhe Jug) mes 17 dhe 26 dhjetorit 2018.
Pyetja që shtrohej ishte: A pajtoheni me korrigjimin e kufijve në këmbim të njohjes de facto dhe de jure të Kosovës nga Serbia?
Një numër i vogël i pjesëmarrësve (12%) u shprehën ‘fuqimisht pajtohem’ ose ‘disi pajtohem’ rreth korrigjimit të kufirit në këmbim të njohjes de facto dhe de jure të Kosovës. Në të kundërtën, shumica e pjesëmarrësve (82%) u deklaruan me ‘disi nuk pajtohem’ ose ‘fuqimisht nuk pajtohem’ me korrigjimin e kufirit, në këmbim të njohjes de facto dhe de jure të Kosovës nga Serbia. /G.F Opinion.al
