Aktori i njohur, Tom Cruise, është detyruar që të mbyllet në një hotel luksoz në Venecia pasi xhirimet e filmit “Mission Impossible 7” janë pezulluar pas shpërthimit të koronavirusit në Itali.
Cruise kishte mbërritur në vendin fqinj më 20 Shkurt dhe do të xhironte në disa prej zonave më piktoreske dhe të famshme të qytetit italian, por gjithçka është shtyrë deri në normalizimin e situatës.
Deri më tani, në Itali janë shkaktuar 7 viktima nga koronavirusi dhe janë prekur 232 persona. Kështu, Italia renditet e treta mes vatrave kryesore të virusit në botë, pas Kinës dhe Koresë së Jugut.
Masat e ndërmarra nga autoritetet, për të vënë nën kontroll epideminë, përfshijnë 50 mijë persona, ndërsa 11 komuna janë në karantinë. Postblloqe rrugore janë vendosur në hyrje të 10 qytezave të Lodinjanos dhe në rrugët që cojnë për në zonën e kuqe kanë nisur procedurat e filtrimit ku forcat e rendit paralajmërojnë shoferët se nëse vendosin të hyjnë, nuk do të kenë më mundësinë të dalin deri në një urdhër të dytë./Opinion.al
