Rusia ka konfirmuar dy rastet e para të personave të prekur nga koronavirusi. Lajmin e ka bërë të ditur zëvendëskryeministrja Tatinana Golikova. Rastet janë konfirmuar një ditë pasi Rusi mbylli kufirin e saj lindor me Kinën.
Sipas gazetës lokale suedeze The Local, edhe atje është konfirmuar rasti i parë me koronavirus. Bëhet fjalë për një grua e cila kishte mbërritur në Suedi më 24 janar pasi kishte vizituar Wuhanin.
Në Mbretërinë e Bashkuar gjithashtu u konfirmuan dy raste me koronavirus. Të prekurit janë dy persona nga e njëjta familje. Gjermania nga ana tjetër ka konfirmuar përmes Ministrisë së Shëndetësisë së Bavarisë se është shtuar edhe një person tjetër i prektur duke e cuar në 6 numrin total të të prekurve. Një nga ata thuhet se është një djalë i vogël.
Në Gjermani dyshohet se rastet e identifikuara janë të lidhura me një kompani bavareze e cila është vizituar nga një grua kineze e infektuar që vinte pikërisht nga Wuhani.
Italia po ashtu konfirmoi dje dy persona të infektuar me koronavirus. Ata ishin një çift kinez që kishte mbërritur në Itali para një jave dhe kishin disa ditë që po qëndronin në Romë.
Deri tani në Kinë janë mbi 9 mijë të prekur nga virusi. Sipas Organizatës Botërore të Shëndetësisë kemi raste të konfirmuara në Hong Kong, Makau, Tajvan, Australi, Kamboxhia, Kanada, Finlandë, Francë, Gjermani, Indi, Itali, Japoni, Malajzi, Nepal, Filipine, Rusi, Sri Lanka, Singapor, Suedi, Tailandë, Kore të Jugut, Emiratet e Bashkuara Arabe, Mbretëri e Bashkuar, SHBA dhe Vietnam.
Viktima ka patur vetëm në Kinë dhe numri i tyre ka arritur në 213. Ndërkohë OBSH e shpalli ditën e djeshme koronavirusin emergjencë globale, teksa epidemia ka kaluar virusin SARS për nga përhapja. /Opinion.al
