Premiera e filmit më të ri të James Bondit është shtyrë për shtatë muaj, për shkak të situatës së krijuar nga koronavirusi. Producentët kanë thënë se e kanë shtyrë prezantimin e filmit “No Time To Die”, nga prilli në nëntor.
Ky njoftim ka ardhur disa ditë pasi krijuesit e dy faqeve online që pëlqejnë filmat e James Bondit, kanë bërë thirrje për shtyrje të datës së premierës. Në Britani të Madhe, data e re e premierës është 12 nëntori, ndërsa në Shtetet e Bashkuara 25 nëntori.
Filmi i fundit Bond, Spectre, ka fituar 900 milionë dollarë, prej kur ishte prezantuar më 2015. Disa analistë të filmave kanë sugjeruar se koronavirusi i ri mund të ndikojë në humbje në fushën e kinematografisë deri në 5 miliardë dollarë, pasi shumica e kinemave janë mbyllur në Kinë, Korenë Jugore dhe Itali.
Në gjithë botën është thënë se 92000 persona janë sëmurë nga ky virus, ndërkohë 3100 persona kanë humbur jetën. Numri më i madh i viktimave ëshë shënuar në Kinë, ku edhe ka shpërthyer virusi për herë të parë në dhjetor të vitit të kaluar.
Koronavirusi i ri përcillet me koll të thatë, temperaturë dhe probleme me frymëmarrje. Sipas të dhënave, shkalla e vdekshmërisë ka qenë dhjetë herë më e lartë te personat e moshuar, në krahasim me ata të moshës së mesme.
