Netflix do të ulë cilësinë e transmetimeve në shërbimet e saj për Evropën për 30 ditët e ardhshme, në mënyrë që platforma të jetë lehtësisht e aksesueshme, dhe që sistemi mos të kalojë në kolaps me ngarkesën e jashtëzakonshme të ditëve të fundit.
Gjiganti amerikan vendosi të reduktojë me 25% cilësinë e transmetimit, duke siguruar gjithsesi, sipas tyre “një shërbim të kënaqshëm për klientët”.
“Pas diskutimeve midis Komisionerit Thierry Breton dhe drejtorin ekzekutiv të Netflix, Reed Hastings, si dhe duke pasur parasysh sfidat e jashtëzakonshme të ngritura nga koronavirusi, Netflix ka vendosur të ulë cilësinë e shfaqes së videos në të gjithë Evropën për 30 ditët në vijim”, u shpreh kompania.
Thierry Breton, Komisioneri Evropian për Tregun e Brendshëm, kishte propozuar më herët se njerëzit duhet të kenë mundësinë të përzgjedhin cilësinë normale të videos kur formati HD [me definicion të lartë] nuk është i nevojshëm.
Pas tyre, edhe Youtube deklaroi se i bashkohet iniciativës, duke pezulluar për 30 ditë versionin “HD” të videove.
Sipas BBC, kërkesa është rritur pasi pandemia e koronavirusit ka detyruar qindra miliona persona, në mos miliarda, që të rrinë në shtëpi për të shmangur përhapjen e saj.
Normalisht kjo përkon me një rritje të madhe të kërkesës së shërbimeve online, në veçanti të atyre që kanë të bëjnë me zbavitjen. Netflix, Amazon Prime, Youtube etj, kanë regjistruar një “shpërthim” njerëzish, por kjo sjell edhe të papritura në infrastrukturë./Opinion.al
