Situata e krijuar nga koronavirusi në Itali, ka alarmuar qytetarët shqiptarë të cilët po përpiqet të marrin masa për t’u mbrojtur.
Kjo gjë ka bërë që të rriten kërkesa për maskat dhe produktet e tjera që parandalojnë simptomat e virusit.
Por duke marrës shkas nga rritja e kërkesë, në treg janë rritur edhe çmimet e këtyre produkteve. Lidhur më këtë, bëhet me dije se Prokuroria e Tiranës ka regjistruar procedim penal për çdo subjekt që ka abuzuar me çmimet.
Në rast se vërtetohet rritja e çmimeve të maskave duke përfituar nga situata e krijuar nga koronavirusi në disa vende të botës, Prokuroria do të nis zyrtarisht hetimet.
Procedimi penal ka nisur pas informacioneve në media dhe shqetësimit të qytetarëve. Farmacistë shprehen se ka një mungesë të theksuar të maskave, ndërsa rrëfejnë se për këtë arsye disa farmaci i kanë shitur edhe me 500 lekë maskat e thjeshta.
Njoftimi i Prokurorisë:
Prokuroria Pranë Gjykatës së Shkallës së Parë, Tiranë, duke marrë shkas nga të dhënat e ndryshme të bëra publike në media si dhe nga administrimi i të dhënave operative në lidhje me veprimet e disa farmacive në drejtim të rritjes së çmimeve të produkteve të ndryshme ka regjistruar procedim penal për veprën penale të “Manipulimi i tregut” parashikuar nga neni 143/a/1 i Kodit Penal.
Aktualisht jemi në fazën e mbledhjes së informacioneve të nevojshme për evidentimin dhe dokumentimin e të gjitha rasteve, në të cilat dyshohet se disa subjekte në mënyrë abuzive dhe të paligjshme kanë rritur çmimet mbi produkte te ndryshme (maska mbrojtëse, produkte me përmbajtje dezinfektuese, etj), duke përfituar nga situata e krijuar për shkak të interesimit, në rang të marrjes së masave kundër Coronavirusit, në dëm të interesave të ligjshme, dhe në shkelje të normave ligjore.
Duke treguar impenjimin maksimal të prokurorisë, në trajtimin e rasteve të tilla, sjellim në vëmendjen e qytetarëve se çdo paraqitje jo e saktë, me dashje, e vlerës së një malli, shërbimi apo paraje, me qëllim çrregullimin e funksionimit të lirë dhe drejtë të tregut, është penalisht e dënueshme.
Vijojmë të ndjekim me interes të shtuar, çdo të dhënë në raport me rastin konkret, duke kërkuar mirëkuptimin dhe besimin e qytetarëve. Nga ana tjetër, mirëpresim çdo qytetar për informacionet që mundet të disponojnë./ Opinion.al
