Kryeministri Edi Rama ishte sot i pranishëm në Komitetin Kombëtar të Sigurisë, ku informoi qytetarët se shtëpia e pushimit e ministrisë së Mbrojtjes në Durrës do kthehet në karantinë për personat që mund të preken nga koronavirusi.
Teksa theksoi se shteti ka marrë të gjitha masat e nevojshme për t’u mbrojtur nga koronavirusi, kryeministri kritikoi mediat, duke thënë se lajmet e rreme për disa klikime më shumë, kanë krijuar panik te qytetarët shqiptarë.
“Është një virus me shumë të panjohura. E panjohura për origjinën, për rastin konkret dhe këtu sygjeroj të kemi parasysh Italinë, ku vijojnë përpjekjet për pacientin zero, por edhe informacionet e përditësuara nga Kina, tregojnë për dyshime të vazhdueshme lidhur me origjinën e vërtetë. E panjohura tjetër është e panjohura për përhapjen, dihet botërisht që është e shpejtë. Një nga pikëpyetjet, është si ka mundësi vendet në kufi me Kinën nuk kanë asnjë rast të shfaqur. E panjohura tjetër mënyra për luftimin efikas, ende nuk është arritur tek një vaksinë specifike dhe kjo mesa komentohet do të kërkojë akoma kohë. Është e pashmangshme por gjithnjë e më problematike po shoqërohet me atë që OBSH e konsideron një rrezik serioz, Infodemia, ose epidemia e lajmeve të pakonfirmuara, të rreme, që influencojnë, ka prekur mbarë Botën dhe ka prekur edhe Shqipërinë, por siç ndodh shpesh kjo situatë është shfaqur në më shumë se sa një formë. Rendja e ethshme për klikime, që sjell shumëfishimin e titujve që përmbajnë fjalën Koronavirus. Sot vendosëm që ta bëjmë këtë mbledhje të hapur për të folur me fakte për situatën, për masat që kemi marrë e do të marrim. Kemi punuar në heshtje për të mos krijuar tensione të rritura artificialisht. Profesionalizmi ka qenë shembullor, e konfirmuar kjo edhe nga OBSH. Më mirë t’u referohemi pikave ku marrim besim se sa pikave ku marrim helmim. Besim në kuptimin e së vërtetës së thjeshtë që si gjithë të tjerat edhe kjo do kalojë. Do e kalojmë së bashku, me kuptim, me përkushtim maksimal nga ana jonë, nga ana e profesionistëve të përfshirë dhe me besim. Më mirë të mbyllni kompjuterët, telefonat dhe të dëgjoni Papa Franceskun, t’i referoheni Biblës apo Kuranit se sa të humbisni kohë me lloj-lloj marrëzisht që njerëz me ligësi organike shpirtërore shpërndajnë duke bërë atë që është çnjerëzore përveç se nga ana profesionale tërësisht e padobishme”,- deklaroi Rama./ Opinion.al
