Situata e krijuar nga koronavirusi ka çuar në ndryshimin e buxhetit të vitit 2020 duke ulur pritshmërinë për realizimin e të ardhurave dhe duke rritur shpenzimet dhe deficitin buxhetor.
Referuar të dhënave zyrtare nga buxheti i shtetit për të përballuar situatën e krijuar nga Covid-19, do të alokohen 12 miliardë lekë, ku 6.5 miliardë lekë do të shkojnë për sektorin social, duke iu siguruar lehtësime dhe mbështetjeve punëmarrësve dhe qytetarëve të prekur nga pezullimi i punës.
Po ashtu 2.5 miliardë lekë do të shkojnë për sektorin e shëndetësisë, për blerje pajisjesh, medikamentesh, materiale mjekësore, për ofrimin e shërbimeve të nevojshme dhe për ekipet mjekësore.
Ndërkohë për furnizimin me ushqime të familjeve në nevojë dhe pensionistë nga buxheti i shtetit do të jepen 2 miliardë lekë, dhe 1 miliardë do të jetë fondi rezervë.
Kjo është paketa ekonomike e prezantuar nga kryeministri Edi Rama pak ditë më parë, e hartuar në kushtet e emergjencës për të përballuar të gjitha shpenzimet që do të vijnë si pasojë e përhapjes së koronavirusit në vendin tonë. / Opinion.al
