Organizata Botërore e Shëndetësisë bën me dije se për herë të parë që pas shpërthimit të koronavirusit, numri i rasteve të reja që raportohen zyrtarisht jashtë Kinës, ka kapërcyer ato që raportohen nga Pekini.
Sipas OBSH-së, 427 raste u raportuan nga 37 vende të martën, krahasuar me 411 nga autoritetet kineze.
Ndërkaq 96.5% e numrit të përgjithshëm të 80.980 rasteve të raportuara deri më tani janë në Kinë. Shifrat e fundit mbi rastet e reja tregojnë se masat e rrepta ndaj krizës të ndërmarra nga Pekini po japin rezultat.
Virusi, COVID-19, ka vrarë deri tani 2,715 njerëz dhe ka infektuar më shumë se 78,000 në Kinë. 52 vdekje të tjera brenda vendit u raportuan të mërkurën, numri më i ulët në tre javë ku asnjëra nuk ishte jashtë provincës Hubei.
Numri i rasteve në Itali, Iran dhe Korenë e Jugut po vazhdon të rritet, një trend që shefi i OBSH, Tedros Adhanom Ghebreyesus, e cilësoi si “thellësisht shqetësues”.
Megjithatë, Tedros paralajmëroi edhe një herë se nuk duhet nxituar për ta cilësuar gjendjen një pandemi. “Përdorimi i fjalës pandemi pa kujdes nuk ka asnjë përfitim të prekshëm, por ai ka rrezik të konsiderueshëm përsa i përket forcimit të frikës dhe stigmës së panevojshme dhe të pajustifikuar, dhe sistemeve paralizuese”, tha ai të mërkurën. “Kjo mund të sinjalizojë që ne nuk mund të përmbajmë më virusin, gjë e cila nuk është e vërtetë”, shtoi kreu i OBSH-së.
Tedros tha se një mision i OBSH-së do të udhëtonte në fundjavë për në Iran, ku 19 persona kanë vdekur dhe 139 të tjerë janë infektuar nga virusi.
Ditën e sotme janë konfirmuar rastet e para të qytetarëve të prekur nga koronavirusi në Greqi, Maqedoninë e Veriut dhe në Brazil, çka e bën atë rastin e parë në Amerikën Latine. /Opinion.al
