Italia “është paralizuar” nga koronavirusi. Qeveria vendosi që për të frenuar përhapjen e virusit covid-19, shkollat dhe universitetet të qëndrojnë të mbyllura në të gjithë vendin deri më 15 mars.
Gjithashtu, do të pezullohen të gjitha manifestimet dhe aktivitetet e çdo lloj natyre. Italianëve u është kërkuar të ndryshojnë stilin e jetesës të paktën për 30 ditë. Nuk do të ketë shtrëngime duarsh, përqafime, apo grumbullime publike përfshirë ato sportive.
Ndërkaq, ndeshjet e futbollit mund të zhvillohen vetëm me dyer të mbyllura kurse të moshuarit mbi 65 vjeç duhet të reduktojnë në maksimum daljen në rrugë.
Qeveria inkurajon punën nga shtëpia ndërsa Kryeministri Giuseppe Conte tha:
“Do të dalim së bashku nga kjo situatë, nga kjo emergjencë. Do të dimë si të tejkalojmë vështirësitë dhe të riafirmohemi në të gjitha vlerat tona. Kur kjo emergjencë të marrë fund, do të hedhim vështrimin prapa dhe jam i sigurtë se do të ndihemi krenarë se si një vend i tërë e përballoi me guxim dhe vendosmëri situatën. I vendosur për të ringritur kokën”, tha kreu i shtetit.
Sipas të dhënave të fundit nga autoritetet italiane, në vend janë 148 viktima,dhe mbi 3296 persona janë të infektuar. Por, lajmi i mirë është se të shëruarit janë më shumë se 270./Opinion.al
