Organizata Botërore e Shëndetësisë (OBSH) ka akuzuar disa vende për një qasje të shkujdesur ndaj koronavirusit. Teksa ka shprehur shqetësimin se në disa shtete niveli i angazhimit politik dhe masat e marra nuk përputhen me nivelin e kërcënimit me të cilin përballemi, organizata sqaron se nuk është koha për justifikime, por për të vepruar .
“Jemi të shqetësuar se disa vende ose nuk e kanë marrë seriozisht situtatën ose kanë vendosur se nuk kanë se çfarë të bëjnë. Jemi të shqetësuar se në disa shtete niveli i angazhimit politik dhe masat e marra nuk përputhen me nivelin e kërcënimit me të cilin përballemi. Nuk është momenti për t’u dorëzuar, nuk është koha për justifikime, është koha për të vepruar në çdo mënyrë”, tha OBSH.
Kjo deklaratë u shoqërua me lëkundje në tregjet financiare, të cilat shënuan një tjetër rënie ditën e sotme. Frika për koronavirusin dominoi shkëmbimet në bursë, ku në Azi, tregjet ranë më mbi 3%, me humbje të theksuara që u regjistruan në Japoni, Korenë e Jugut e Hong Kong. Më herët, Wall Street u mbyll me një tkurrje prej 3.5%.
Sipas të dhënave të përditësuara, virusi Covid-19 i ka marrë jetën rreth 3300 personave në të gjithë botën dhe ka infektuar gati 97 mijë të tjerë. Italia mbetet vatra kryesore e virusit në Evropë, por edhe vendet e tjera raportojnë gjithnjë e më shumë raste. Britania e Madhe dhe Zvicra njoftuan viktimat e para nga sëmundja.
Shtatë persona kanë humbur jetën në Francë. Situata mbetet alarmante edhe në SHBA, ku rastet janë raportuar në 12 shtete dhe janë shënuar 12 viktima.
