Italia alarmon të gjithë Evropën dhe veçanërisht vendet fqinje pasi duket se është kthyer në një qendër të shpërndarjes së koronavirusit të ri në kontinentin e vjetër, por dhe përtej saj.
Austria, Kroacia dhe Zvicra kanë konfirmuar gjatë 24 orëve të fundit rastet e tyre të para të prekjes nga virusi vdekjeprurës teksa kanë sqaruar se personat e prekur kishin udhëtuar nga Italia Qendrore dhe ajo e Veriut. Ndërkohë, është regjistruar edhe testi i parë pozitiv në Amerikën Latine, me një qytetar brazilian që po ashtu, sapo ishte kthyer nga Italia.
Pavarësisht frikës e panikut, se vendi po shërben si vatër e përhapjes së virusit, fqinjët e Italisë kanë vendosur se mbyllja e kufijve mund të jetë e papërshtatshme.
“Flasim për një virus që nuk respekton kufijtë”, tha ministri italian i Shëndetësisë, Roberto Speranza ndërsa homologu i tij gjerman, Jens Spahn, u shpreh se vendet evropiane po e shqyrtojnë situatën me shumë seriozitet dhe i tremben një përkeqësimi të saj.
Përhapja e shpejtë e koronavirusit në veriun e vendit ka bërë që Italia të renditet e treta mes vatrave kryesore të virusit në botë, pas Kinës dhe Koresë së Jugut, duke tejkaluar edhe Japoninë, (sipas të dhëna nga Universiteti Johns Hopkins).
