Zëvendësministri i shëndetësisë së Iranit, Iraj Harichi ka rezultuar pozitiv ndaj koronavirusit dhe është futur në karantinë. Kjo shënon rastin e parë që një zyrtar i një niveli të tillë, preket nga virusi vdekjeprurës, që siç duket nuk kursen as politikanët.
“Aljazeera” shkruan se dalja e fundit publike e zv.ministrit ishte një konferencë për media dhënë ditën e hënë, ku ai përgënjështronte lajmet se 50 persona kishin ndërruar jetë nga virusi në vend.
Irani ishte vendi i parë në Lindjen e Mesme me raste të konfirmuara të koronavirusit. Sipas të dhënave zyrtare, 15 persona kanë ndërruar jetë nga 95 raste të konfirmuara në vend.
Ndërkohë, Turqia ka mbyllur kufijtë me Iranin. Po ashtu një avion nga Teherani është ndaluar në shtetin turk dhe bordi prej 132 pasagjerësh është vendosur në karantinë për 14 ditë për të parë nëse dikush prej tyre rezulton i infektuar.
Deri më tani në rang global, më shumë se 80 mijë persona janë konfirmuar të prekur me koronavirus, ndërsa të paktën 2700 persona kanë ndërruar jetë./Opinion.al
