Koronavirusi deri më tani ka shkaktuar 19 viktima në Shtetet e Bashkuara të Amerikës, ndërsa të infektuar janë mbi 440.
Ndërkohë, në SHBA ka shkaktuar shqetësim diagnostikimi i një personi me koronavirus që kishte qenë i pranishëm në një konferencë të Aksionit Politik Konservator javën e kaluar në Merilend, ku ka marrë pjesë edhe Presidenti amerikan Donald Trump, zv.presidenti Pence dhe zyrtarë të tjerë.
I pyetur nga gazetarët nëse kishte shqetësim për ekspozimin ndaj koronavirusit, Trump tha: “Nuk jam fare i shqetësuar”.
Gjatë një takimi me presidentin brazilian Jair Bolsonaro, Trump tha gjithashtu se nuk do të anulonte asnjë tubim politik, pavarësisht përhapjes së virusit. “Kemi bërë një punë fantastike në lidhje me virusin”, u shpreh ai.
Të shtunën, Shtëpia e Bardhë tha përmes një deklarate se ishte në dijeni të diagnostikimit me koronavirus të një personi që kishte marrë pjesë në konferencë por shtoi se nuk kishte asnjë të dhënë që ai person ishte takuar me presidentin Trump apo me zëvendësin Pence./ Opinion.al
