13 viktima janë regjistruar nga koronavirusi në 24 orët e fundit në Serbi, duke çuar numrin në total të viktimave në 330. Ministria e Shëndetësisë e Serbisë njoftoi edhe për 299 raste të reja të të infektuarve me koronavirus. Rezultatet dolën pas testimit të 8.228 personave.
Në spitalet e Serbisë, 110 pacientë janë duke u trajtuar me respitatorë. Më 3 korrik, Serbia shpalli gjendje të jashtëzakonshme në Beograd dhe rivendosi një sërë kufizimesh për të ngadalësuar përhapjen e koronavirusit.
Qeveria njoftoi se veshja e maskave është bërë e detyrueshme në hapësirat e mbyllura publike dhe në transportin publik. Po ashtu u bë e ditur se klubet e natës dhe kafenetë do të qëndrojnë të mbyllura nga ora 23:00 deri në 06:00, ndërsa tubimet do të kufizohen në 100 persona brenda dhe në 500 jashtë. Ata që nuk mbajnë maska në hapësira të mbyllura, përballen me gjoba.
