Filmat e shfaqur online do të mund të garojnë në ceremoninë e vitit të ardhshëm të çmimeve Oscar.
Për herë të parë në histori, Akademia e çmimeve Oscar, njoftoi se do të lejojë nominimin e filmave që nuk janë shfaqur në kinema, por në shërbime streaming si Netflix, Hulu, HBO, Amazon Prime etj.
Më parë, një film duhej të shfaqej për të paktën shtatë ditë në kinema në Los Angeles që të merrej parasysh për një çmim Oscar, ndërsa tani, filmat e planifikuar për t’u shfaqur ne kinema, por që u ngarkuan në shërbime streaming, janë njësoj të përzgjedhshëm.
“Akademia beson se magjia e filmave përjetohet duke i parë në kinema. I qëndrojmë të palëkundur këtij besimi. Sidoqoftë, pandemia tragjike e Covid-19 kërkon anullimin e përkohshëm të rregullave.” tha presidentja dhe CEO e Akademisë, Dawn Hudson, në një deklaratë për shtyp.
Përzgjedhja e të nominuarve për Oscar u vu në pikëpyetje pasi izolimet dhe distancimi social shkaktuan anullimin e festivaleve të filmit si ai i Kanës apo South by Southëest dhe mbylljen e kinemave.
Hudson cilësoi se ndryshimi nuk do të jetë i përhershëm dhe do të vlejë vetëm për filmat e publikuar këtë vit. Në momentin që kinematë do të hapen, gjithçka do të kthehet në normalitet.
Akademia njoftoi dhe disa ndryshime të tjera. Kategoritë e miksimit të zërit dhe montazhit të zërit do të shkrihen në një kategori të quajtur arritja më e madhe në zë, për të theksuar punën në grup.
Të gjithë anëtarët e Akademisë do të kenë të drejtë të votojnë në raundin e parë të filmit ndërkombëtar, kategori që më parë njihej si filmi më i mirë në gjuhë të huaj./Opinion.al
