Kreu i Gardës Revolucionare të Iranit, Hossein Salami deklaroi sot se koronavirusi mund të jetë një sulm biologjik i Shteteve të Bashkuara kundër Kinës dhe Iranit.
“Ne do të fitojmë në luftën kundër virusit, i cili mund të jetë një produkt i pushtimit biologjik amerikan, sepse ai u përhap fillimisht në Kinë, pastaj në Iran e më pas në pjesën tjetër të botës”, deklaroi Salami para turmave në Kerman.
Ai shtoi më tej: “Sot vendi ynë është i përfshirë në një luftë biologjike. Edhe këtë herë vendi ynë do të fitojë, edhe në luftën kundër virusit. SHBA duhet ta dijë se nëse e ka bërë ajo, virusi do të kthehet atje”.
Më herët edhe kreu i mbrojtjes civile të Iranit, Gholam Reza Jalali, sugjeroi se epidemia është një sulm biologjik kundër Kinës e Iranit, por pa përmendur SHBA-në. Si argument, ai përmendi propagandën mediatike që ka shoqëruar koronavirusin, e cila sipas tij është shoqëruar me rrënim ekonomik për dy vendet.
Sipas të dhënave të përditësuara nga Organizata Botërore e Shëndetësisë, në Iran virusi ka shkaktuar 107 viktima dhe ka prekur mbi 3,500 të tjerë. Mes të infektuarve ka pasur dhe zyrtarë të nivelit më të lartë si zëvendësministri i Shëndetësisë./Opinion.al
