Ministrja e Shëndetësisë dhe Mbrojtjes Sociale, Ogerta Manastirliu, ditën e sotme inspektoi njësinë e shëndetësisë në Portin e Vlorës, ku janë marrë masat për zbatimin e protokolleve ndërkombëtare për parandalimin e shpërndarjes së koronavirusit.
“Përmirësimi i survejancës aktive është shumë i rëndësishëm, në përputhje me rregulloren ndërkombëtare të shëndetit. E rëndësishme është që shërbimi është 24/7 dhe bashkëpunimi me epidemiologun është i vazhdueshëm për ndjekjen e rasteve”, tha Manastirliu.
Po ashtu, ministrja u shpreh gjatë inspektimit se planet e kontrollit do të jenë të ndryshme, duke marrë në konsiderat shkallën e rrezikut.
Në pikat kufitare ajrore, tokësore dhe portuale, aktualisht ka kontrolle të përforcuara dhe masa higjieno-sanitare të shtuara.
Pas mbledhjes së dytë të Task-Forcës për koronavirusin e ri, në përgjigje të emergjencës globale të shpallur nga Organizata Botërore e Shëndetësisë janë marrë masa për të rritur kontrollin, gjurmimin e rastit dhe izolimin e tij si dhe gjendjen e karantinës nëse do jetë e nevojshme.
Ndërkohë, Shqipëria vijon të mbetet vend me rrezikshmëri të ulët dhe nuk ka asnjë rast të prekur nga koronavirusi në vendin tonë./ Opinion.al
