Prej tre ditësh Shqipëria është një ndër vendet e prekura nga koronavirusi. Nga dita e djeshme janë 10 raste të konfirmuara dhe kjo ka bërë që qeveria të ndërmarrë masa për parandalimin e mëtejshëm të përhapjes së virusit.
Ndër masat e para ishin mbyllja e shkollave, ndërprerja e aktiviteteve me pjesëmarrje masive të njerëzve dhe pezullimi i udhëtimeve ajrore dhe detare me Italinë.
Ditën e djeshme kryeministri Rama njoftoi se do të mbyllen gjithashtu të gjitha ambientet që mbledhin shumë njerëz, si lokale nate, disko ose palestra.
Ndërsa sot kreu i grupit parlamentar të Partisë Socialiste, Taulant Balla ka njoftuar se është anuluar seanca plenare që ishte parashikuar të zhvillohej ditën e nesërme.
“Deputetët do të vijojnë angazhimin e tyre në komisione dhe në ndjekjen e situatës, duke respektuar masat e rrepta të përcaktuara nga MSH”, njofton Balla. /Opinion.al
