Qeveria në Kinë ka akuzuar SHBA-në për shkaktimin e ‘panikut’ lidhur me situatën e Koronavirusi. Kjo vjen pas vendimit të SHBA-së për të shpallur gjendjen e emergjencës si dhe për ndalimin e hyrjes në Amerikë të personave që dy javët e fundit kanë qenë në Kinë.
Gjatë një konference të hënën zëdhënësja e ministrisë së jashtme kineze Hua Chunying u shpreh se veprimet e SHBA.-së “mund të krijonin dhe përhapnin frikë” në vend që të ofronin ndihmë, pasi ishte vendi i parë që vendosi një ndalim për udhëtarët kinezë dhe i pari që sugjeroi një tërheqje e pjesshme e stafit të saj të ambasadës.
“Janë pikërisht vendet e zhvilluara si SHBA me aftësi të forta parandaluese të epidemisë që kanë marrë rolin kryesor në vendosjen e kufizimeve të tepërta në kundërshtim me rekomandimet e OBSH”,-u shpreh ajo.
Gjithashtu vende të tjera si Australia vendosën ndalimin e hyrjes për udhëtarët kinezë menjëherë pas ndalimit të SHBA-së.
Më 30 Janar Organizata Botërore e Shëndetësisë shpalli gjendjen e emergjencës. Aktualisht më shumë 17,000 raste janë konfirmuar të prekur nga Koronavirusi dhe 361 kanë humbur jetën në Kinë. Jashtë Kinës janë konfirmuar 150 raste dhe vetëm një person ka humbur jetën në Filipine./Opinion.al/
