Situata është mjaft dramatike në Itali për shkak të pandemisë së shkaktuar nga koronavirusi. Përballë numrave gjithnjë e në rritje, sistemi shëndetësor duket se po shkon drejt kolapsit total.
Problematike paraqitet gjendja në veri të vendit. Guvernatori i Lombardisë, Attilio Fonatana, paralajmëroi se Italia është afër situatës ku nuk do të ketë më krevate në reanimacion. Në alarm edhe spitali i Bergamos: “Nëse trendi i epidemisë do të vazhdojë me këtë ritëm, Bergamo do të mund të rezistojë vetëm për pak kohë, spitalet janë të tejmbushur dhe krevatet për mbarojnë”, është dëshmia e Ivano Riva, anestezist dhe reanimator në Spitalin “Giovanni XIII” në Bergamo.
Italia po vuan gjithashtu dhe nga mungesa e pajisjeve të tjera të rëndësishme në kurimin e pacientëve të infektuar me koronavirus. Autoritetet njoftuan se kanë porositur mijëra respiratorë nga jashtë, ndërsa mirëpresin ndihma nga shtete të ndryshme sa i përket mjeteve mbrojtëse si maska dhe doreza.
“Prioriteti ynë është që të garantojmë siguri të plotë në punën e mjekëve, infermierëve dhe të gjithë personelit sanitar, të cilët me guxim të madh po kurojnë qytetarët duke iu dedikuar kësaj emergjence shëndetësore pa kursyer energji”, u shpreh kryeministri Italian, Giuseppe Conte.
Thirrjes për ndihmë i është përgjigjur Gjermania. Qeveria e drejtuar nga kancelarja Angela Merkel ka dërguar 1 milionë maska mbrojtëse në Itali. Gjithashtu edhe Franca ka premtuar një kontribut të vogël në këtë drejtim, sipas asaj që raporton qeveria e Romës.
