Pandemia e koronavirusit po përhapet me një ritëm shumë të lartë edhe në vendet që kanë standartet për të larta të jetesës. Epiqendra e shpërthimit tashmë është zhvendosur nga Kina në Europë, ndërsa Shtetet e Bashkuara duket se tronditen me të njejtën magnitudë infektimesh.
Për këtë arsye shtetet afrikane kanë rritur përpjekjet për të parandaluar përhapjen e koronavirusit.
Shkalla e infeksionit në kontinentin me 54 vende është ende e ulët, rreth 2.700 raste në 46 shtete.
Frika është se numri do të rritet me shpejtësi për shkak të infeksioneve që janë aktualisht të pranishme, duke kolapsuar kështu shërbimet shëndetësore në kontinentin më të varfër.
Uganda ka ndaluar të gjithë transportin publik, duke krijuar frikë dhe panik në kryeqytetin, Kampala. Forcat e sigurisë kanë mbyllur bizneset në kryeqytet dhe rrugët e Kampala tani janë kryesisht të shkreta. Në fotot e siguruara nga AFP shihen se si forcat e rendit godasin qytetarët duke i detyruar të vetizolohen në shtëpi.
Nigeria, shteti më i populluar i Afrikës me një popullsi prej afro 200 milionësh, thotë se do të ndalojë të gjitha udhëtimet në vend, por ende nuk ka treguar se kur. Qeveria atje mori një donacion, përfshirë 100,000 maska mbrojtëse, nga miliarderi kinez Jack Ma.
Në Kenia, ekonomia më e madhe e Afrikës Lindore, Presidenti Uhuru Kenyatta ka njoftuar një shtetrrethim gjatë mbrëmjes duke nisur nga e premtja. Presidenti i Kenias ka ulur pagën e tij me 80%, ndërkohë ai përgatit vendin për kohë të vështira ekonomike dhe u ka kërkuar zyrtarëve të tjerë që të ndjekin të njejtin veprim.
Kenia është përfshirë gjithashtu në nje incident sa i përket maskave. Një ngarkesë me 6 milionë maska e destinuar për në Gjermani u zhduk në aeroportin e Kenias. Zyrtarët gjermanë bën menjëherë të qartë se nuk do të paguanin për maskat që kishin porositur. /Opinion.al
