Bilanci në Italinë fqinje ka marrë trajtë të frikshme pasi në harkun kohor të 24 orëve, kanë ndërruar jetë 28 persona nga koronavirusi. Kështu numri i përgjithshëm i viktimave ka shkuar në 107.
Sipas të dhënave të fundit nga autoritetet italiane, mbi 3089 persona rezultojnë të prekur dhe 276 pacientë janë shëruar. Emergjencat Civile, sqarojnë se shumica e rasteve janë në Lombardi, Emilia Romanja dhe Veneto.
Ndërkaq, italianëve u është kërkuar të ndryshojnë stilin e jetesës të paktën për 30 ditë. Nuk do të ketë shtrëngime duarsh, përqafime, apo grumbullime publike përfshirë ato sportive.
Ndeshjet e futbollit mund të zhvillohen vetëm me dyer të mbyllura kurse të moshuarit mbi 65 vjeç duhet të reduktojnë në maksimum daljen në rrugë.
Qeveria synon, gjithashtu, të fuqizojë sistemin shëndetësor me një rritje prej 50 përqind të shtretërve në terapi intensive, ku po ndihet edhe më shumë emergjenca e koronavirusit./Opinion.al
