Kina ka regjistruar vetëm 11 raste të personave të prekur nga koronavirus gjatë 24 orëve të fundit, ndërkohë që numri i vdekjeve për të njëjtin hark kohor është shënuar 13. Sipas të dhënave të përditësuara, nga rastet e reja vetëm 4 raportohen në Wuhan, aty ku nisi edhe epidemia. Pasi ka mbyllur edhe spitalet e ngritura për të përballuar krizën, Kina është ofruar të ndihmojë Italinë, që aktualisht është e para në botë për deklarimin e rasteve të reja, me më shumë se 17 mijë persona të infektuar dhe 1266 viktima.
Dy ditë më parë, një ekip me 9 infermierë dhe mjekë nga Kina zbarkoi në Itali me 30 ton pajisje mjekësorë, me anë të një fluturimi direkt nga Shangai për në Romë. Në këtë pako ndihme, përfshihen pajisje respiratore si dhe maska, për të cilat Italia ka tepër nevojë, pasi ka mangësi të theksuara.
Deri tani, koronavirusi ka prekur mbi 80 mijë persona në Kinë, nga të cilët 3189 kanë humbur jetën. Aktualisht, ndërsa vatra e virusit po vjen duke u shuar në Kinë, përhapja e tij po dominon në Europë, sikurse kanë bërë me dije ekspertët e OBSH-së. Numri I të prekurve në të gjithë botën, ka shkuar në 145 mijë./Opinion.al
