Kopshti ku rriten fëmijët e qytetit të Përrenjasit është në gjendje të mjerueshme. Aty duket se koha ka ndaluar, pasi kushtet janë njësoj si para viteve ‘90.
Kopshti është me soba druri, krevatet për shkak të hapësirave të pamjaftueshme i kanë vendosur njëri mbi tjetrin. Krevatet janë si ata të materniteteve para viteve 90, metalik, lyer me bojë vaj të bardhë.
Dyert e klasave lyer me bojëvaji ngjyrë jeshile nuk mbyllen. Instalimet elektrike kanë shpërthyer në flakë, dhe akoma duken shenjat e djegies në mur. Emisioni “Boom” sjell pamjet dhe dëshmitë e personelit, drejtoreshës dhe edukatoreve.
“Kemi 5 grupe me nga 36 fëmijë, pra 10 mbi normën në secilin grup dhe kanë nga një edukatore”, tha drejtoresha.
Bashkia e Përrenjësit shpreson të fitojë projekt nga Ministria e Arsimit, pasi nuk ka fonde për ta rikonstruktuar kopshtin.
Ani Allkoja, Drejtor i Urbanistikës tha se “kemi hartuar një projekt, për ngritjen e një kati shtesë dhe rikonstruksion të godinës ekzistuese. Kostoja arrin në shifrën e 28 milionë lekëve (të reja). Ne po presim thirrjen e Ministrisë së Arsimit për ta çuar këtë projekt. Në nëntor duhet të ishte hapur aplikimi për këtë thirrje, por akoma nuk ka ndodhur. Po presim të aplikojmë këtë vit. Është një kosto që bashkia nuk mund ta përballoj dot vetëm”.
/Burimi: Ora News
