Në nëntor të vitit 2023 emisioni “Stop” në Tv Klan publikoi një rast të dhimbshëm, në të cilin një vajzë 3- vjeçare përfundoi me këmbë të thyer në kopshtin “Stinët” nga edukatorja Majlinda Dehima.
Në atë kohë nisi një kontroll i këtyre institucioneve për licencë e kushte.
Sipas Agjencisë së Arsimit Parauniversitar, vetëm përgjatë muajve nëntor-dhjetor 2023 u zbuluan 60 subjekte pa licencë, pjesa më e madhe e tyre në Tiranë, ku përveç gjobave u mor vendimi për mbylljen e menjëhershme.
Edhe në vitin 2024 janë zbuluar dhjetëra subjekte pa licencën e duhur për kopsht.
Por, shumë nga këto subjekte kanë ndryshuar fushën e veprimtarisë duke u kthyer në “qendra ditore” ose “shërbime të përkujdesit komunitar” dhe kjo sipas Drejtorisë së Arsimit ka penguar ushtrimin e kontrollit.
Shumë të tjera nuk u gjetën fizikisht. Thënë më thjesht, subjektet me shkelje vazhdojnë të funksionojnë si kopshte pavarësisht se kanë një licencë tjetër.
Ndriçim Mehmeti, ekspert i arsimit, thotë se kjo është një mënyrë për të mbyllur sytë ndaj paligjshmërisë. Atë që nuk bëjnë institucionet, e bën “Stop” duke dalë në terren ku zbulon se disa subjekte pavarësisht se punojnë si kopshte, nuk kanë licencë për kopsht ose e kanë për shërbime të tjera.
“Stop” ndalet konkretisht te “Kopshti i Letës” në Don Bosko dhe te kopshti “Erbore” në Komunën e Parisit.
Duke u bazuar në listën e kopshteve që gjenden në faqen zyrtare të Ministrisë së Arsimit, “Stop” pyeti nëse ato zotërojnë ose jo licencën e duhur. Kopshti privat “Borëbardha” në Don Bosko, pasi në QKB ka një licencë për shërbime të përkujdesit komunitar, por në realitet funksionon si një kopsht.
Gazetari: Ju si institucion çfarë licence keni për ushtrimin e këtij aktiviteti?
Mexhina Merkaj: Licencë për kopshtin dhe për çerdhen.Por, për çfarë po e merr ti këtë informacion? Pse jam e detyruar unë ta jap këtë informacion?
Gazetari: Ju, e keni licencën për arsimin parauniversitar apo keni një licencë tjetër?
Mexhina Merkaj: Atëherë, të lutem! E para, po më merr kohë.Ti po bën punën tënde, po edhe unë jam në punën time.
Gazetari: Pra, ta marrim si një përgjigje që nuk e keni licencën? Të largohemi?
Mexhina Merkaj: Po!
Gazetari: Dhe tjetra, ju keni një adresë në rrugën “Jordan Misja” dhe nuk e keni këtu, apo jo?
Mexhina Merkaj: Shiko certifikatën e hipotekës! Të lutem!
Gazetari: Dhe tjetra, nuk e keni… Ah, kjo ishte përgjigja?
Mexhina Merkaj: Faleminderit!
Gazetari: Duhet të keni licencën e duhur, e dashur.
Mexhina Merkaj: Stop! Stop se do të të hedh në gjyq! ( i drejtohet operatorit)
Gazetari: Drejtoreshë, më hidh mua në gjyq! Do më hedhësh mua në gjyq? Që tani! Këtu në rrugë nuk më ndalon dot.
Mexhina Merkaj: Këtu para shtëpisë sime?
Gazetari: Nuk e keni licencën, e dashur!
Mexhina Merkaj: Ik!
Për shkak të gjetjeve nga emisioni “Stop” për subjektin “Borëbardha”, Agjencia e Arsimit e gjobiti atë me 10 milionë lekë gjobë për shkak se nuk kishte licencën e duhur, si dhe vendosi mbylljen e menjëhershme të tij.
Inspektoriati i Punës ishte një tjetër institucion të cilit iu drejtua emisioni.
Ky inspektoriat gjithashtu gjeti shkelje në kontratat e punës, mosvendosjen në dispozicion e kontratës për mjekun e shkelje të tjera. Ndërsa Inspektorati i Shëndetësisë e gjobiti me 5 milionë, për shkak se subjekti zotëron një licencë në shkelje të ligjit për Inspektoriatin Sanitar./tvklan
