Kreu i Grupit Parlamentar të PS, Taulant Balla ka deklaruar në një dalje për mediat pas mbledhjes së Grupit Parlamentar të socialistëve se deputetët e PS do jenë në terren për të kontrolluar çmimet.
Balla u shpreh se grupi parlamentar nuk mund të jetë i përjashtuar nga një axhendë intensive kontrolli në 12 qarqe të vendit në më shumë se 300 njësi administrative. Sipas tij nuk duhet të ketë abuzime me çmimet në kurriz të qytetarëve.
“Aktet Normative kanë hyrë tashmë në fuqi dhe po zbatohen. Deputetët do t’i bashkohen ministrave për të certifikuar masat e marra nga qeveria dhe për të kontrolluar respektimin e çmimeve, qoftë ato të karburanteve dhe qoftë ato ushqimore. Edhe grupi parlamentar nuk mund të jetë i përjashtuar nga një axhendë intensive kontrolli në 12 qarqe në më shumë se 300 njësi administrative në të gjitha bashkitë në mënyrë që këto masat e marra të rspektohen. Nesër do të kemi në Kuvendin e Shqipërisë një mocion me debat, të iniciuar nga grupi Parlamentar të Partisë Demokratike. Debati do të zgjasë 3 orë ku secili nga grupet do të ketë peshën që i takon. Me të mbaruar seanca nesër të gjithë deputetët e grupit parlamentar të PS do të jenë në territor”, tha Balla./Opinion.al
