Gjashtë drejtues të organizatës MEK, janë proceduar penalisht nga policia, pasi kundërshtuan me dhunë punonjësit e Policisë së Shtetit dhe dëmtuan automjetet e Policisë, me qëllim pengimin e tyre për të ushtruar kontrolle në vendqëndrimin e organizatës MEK, në Manzë të Durrësit.
Policia bën me dije se gjatë operacionit të djeshëm, efektivët janë ndeshur me kundërshtimin e dhunshëm dhe të vazhdueshëm të muxhahedinëve që strehoheshin në rezidencë, të cilët tentuan të pengonin shërbimet e Policisë për të vijuar kontrollet dhe për të sekuestruar provat materiale.
Si pasojë e kundërshtimeve të dhunshme dhe të vazhdueshme, janë dëmtuar 15 punonjës policie dhe automjete të Policisë së Shtetit.
Po ashtu Policia bën me dije se pavarësisht dhunës së ushtruar ndaj tyre, efektivët janë vetëpërmbajtur, duke mos iu përgjigjur proporcionalisht dhunës që po ushtrohej ndaj tyre.
Ndërkaq uniformat blu njoftojnë se ka nisur procedimi penal në gjendje të lirë, për 6 shtetas iranianë. Konkretisht bëhet fjalë për: H.N., 73 vjeç; M.B., 72 vjeç; A.A., 72 vjeç; B.S., 63 vjeç; A.A., 61 vjeç dhe D.F., 70 vjeç.
Ata akuzohen për veprat penale “Mosbindja ndaj urdhrit të punonjësit të policisë së rendit publik” , “Kundërshtimi i punonjësit të policisë së rendit publik”, “Shkatërrimi i pronës” dhe “Pengime për ekzekutimin e vendimeve të gjykatës”./Opinion.al
