TIRANË- Dy biznesmenë akuzohen për kontrabandë me vlerë 1 milionë euro. Siç bën të ditur prokuroria shtetasit Gjovalin Ndoj dhe Paulin Preçi, administratorë të kompanisë së lojërave të fatit “Saturn Games” blinin pajisje “lojëra elektronike” në Gjermani dhe Slloveni dhe i deklaronin pranë autoriteteve doganore me shifra shumë herë më të ulta blerjeje. Duke shmangur taksat doganore ato kanë arritur ti vjedhin shtetit 1 mln euro. Prokuroria thotë se ata po hetohen në mungesë me masën e sigurimit “arrest në burg”. Pra biznesmenët janë në arrati, ndërkohë nuk ka asnjë doganier të proceduar për këtë megaskandal në dogana.
“Në bazë të veprimeve hetimore të Prokurorisë Tiranë rezulton se dy administratorët e kompanisë, në funksion të aktivitetit të tyre, gjatë vitit 2011 dhe 2012 kanë blerë një sasi të konsiderueshme makinerish për lojëra fati në kompani të ndryshme në Gjermani dhe Slloveni”, thuhet në njoftimin e prokurorisë.
Këto blerje janë deklaruar shumë herë më të vogla pranë autoriteteve shqiptare, krahasuar me faturat origjinale të blerjes, të cilat janë përftuar në bazë të letër-porosive të Prokurorisë Shqiptare, si edhe kërkesave për ndihmë zyrtate të Drejtorisë së Përgjithshme të Doganave, drejtuar autoriteteve gjyqësore dhe doganore gjermane dhe sllovene.
Paulin Preçi, përfaqësues i “Saturn Games”, në vitin 2011 ka realizuar 7 hyrje malli në degën doganore Tiranë, të cilat, nga hetimi, rezulton se janë të gjitha të shoqëruara me dokumente blerjeje të fallsifikuara.
Po ashtu, rezulton se Gjovalin Ndoj, në cilësinë e përfaqësuesit të “Saturn Games”, në vitin 2012, ka realizuar 10 hyrje malli në degën doganore Tiranë, të cilat, nga hetimi, rezulton se janë të gjitha të shoqëruara me dokumente blerjeje të fallsifikuara.
