Tre doganierë dhe një polic i Kapshticës kanë rënë në pranga për futjen e mallrave kontrabandë. Policia dhe SHÇBA arrestuan në flagrancë 7 persona, nga të cilët 3 doganierë, 1 punonjës policie, 3 shtetas, si dhe 2 të tjerë u shpallën në kërkim. Veprimet u finalizuan me sukses përgjatë operacionit të koduar “Mjegulla”.
Në hyrje të qytetit të Bilishtit tregtarët janë kapur në flagrancë duke transportuar 22 ngarkesa me veshje të ndryshme me mjetet tip ‘Mitsubishi’ me targë AA 478 HV; ‘Volkswagen’ me targë AA 857 FI dhe një mjet kamion me targë AA 233 PT.
Ngarkesa me veshje u transportua nga Greqia në drejtim të Shqipërisë, përmes Pikës së Kalimit Kufitar të Kapshticës.
Pesë persona sillnin sasinë e veshjeve deri në Pikën e Kalimit Kufitar të Kapshticës me një kamion, të cilin e parkonin në doganën greke dhe më pas brenda ditës kalonin 3-4 herë drejt tokës shqiptare mallrat, me mjete të tjera më të vogla transportuese. Mallrat janë futur kontrabandë nëpërmjet Degës Doganore Kapshticë pasi nuk kanë kryer praktikat doganore.
Të arrestuar janë:
– Flobenc Gaxho, 45 vjeç, banues në Tiranë, me detyrë përgjegjës turni në doganën Kapshticë.
– Gentian Keco, 33 vjeç, banues në fshatin Baban, Devoll me detyrë doganier.
– Fredi Blushi, 56 vjeç, me detyrë doganier në Pikën e Kalimit Kufitar Kapshticë
– Sali Dervishi, 53 vjeç, banues në Zëmblak, Maliq, me detyrë punonjës policie.
– Klodian Korçari, 42 vjeç, banues në Bulgarec, Korçë.
– Xhuliano Skënderasi, 34 vjeç, banues në Vloçisht, Maliq.
– Gazmir Shkëmbi, 34 vjeç, banues në Dvoran, Korçë.
Ndërsa shtetasit G.A., 32 vjeç dhe S.Sh., 53 vjeç, u shpallën në kërkim.
