Grupi i tretë më i madh në Parlamentin Europian, Aleanca e Konservatorëve dhe Reformistëve në Europë, ka mbështetur vendimin e opozitës shqiptare për t’u bashkuar kundër qeverisë dhe ndërmarrjen e hapave konkretë për luftën ndaj korrupsionit.
“Nën dritën e destabilitetit politik, krizës qeverisëse dhe listës së gjatë të skandaleve të bëra publike së fundmi, Aleanca beson se vetëm një qeveri e re me bazë të gjerë politike mund të garantojë fundin e qorrsokakut ku është futur politika shqiptare si dhe të rifitojë besimin e qytetarëve për zbatim të proceseve demokratike europiane dhe shtetit të së drejtës”, thuhet në deklaratë.
Partia Republikane e Shqipërisë është pjesë e Aleancës së Konservatorëve dhe Reformistëve në Europë, njohur me akronimin ACRE. Parti të tjera pjesë e ACRE janë Partia Konservatore në Angli, Fratelli d’Italia e Italisë, Partia Demokratike e Kosovës, Liberalët Konservatorë në Gjermani dhe shumë parti të tjera brenda dhe jashtë Europës.
Në reagimin e saj, Aleanca e Konservatorëve dhe Reformistëve në Europë, shpreh shqetësimin e vazhdueshëm për largimin masiv të qytetarëve shqiptarë, e shkaktuar, sipas saj për shkak të keqmenaxhimit nga ana e qeverisë./Opinion.al
