Nga Desada Metaj
Prej 4 ditësh është zbuluar se qeveria ka dhëne më koncension për 10 vjet shërbimin e hemodializës, një proces jetik për ata persona, veshkat e të cilëve nuk e kryejnë dot vetë pastrimin e gjakut. Fituese e koncensionit prej 86 mln USD është shpallur kompania “Evita”. Agjensia BIRN zbuloi se Evita, e rregjistruar në QKR në maj 2013, e kishte në një kafe në Berat adresën e pronares së vetme, vajza e xhaxhait të administratorit të Spitalit Amerikan, Klodian Allajbeu. Këto fakte, që nuk i ka përgënjeshtruar askush, lënë dyshime mbi transparencën e tenderit. Megjithatë, kjo nuk është anomalia e vetme e ketij rasti, por pothuajse të gjithë heshtin. Qeveria, nga ana e vet, ka folur vetem një herë për rastin Evita. Pas reagimit në Transparenca.al u konfirmua zyrtarisht se më Eviten bashkëpunonte Spitali Amerikan. Reagimi i qeverisë ka lënë shumë pikëpyetje pa sqaruar, por më e rëndësishmja është se ka lënë pa përgjigje përse u zgjodh Evita që, sipas dokumentave të botuar nga BIRN, ka bërë ofertën e dytë më të lartë për të dhënë shërbimin e hemodializës. Qeveria këmbëngul se “shërbimi i hemodializës do të kryhet nga operatorë me eksperiencë, sepse ne krahë te Evita qendron Spitali Amerikan”. Qeveria nuk sqaron sesi Spitali Amerikan është bërë pjesë e koncensionit për shërbimin e hemodializës.
Ndërsa për opozitën ky rast nuk ekziston. PD po hesht.
Këto 4 ditë në foltoren e PD është folur për tenderin 2 milionë euro te jaguarëve superluksozë, por jo për tenderin 86 mln USD të Evita shpk. I vetmi që është shprehur për këtë rast është Tritan Shehu në llogarinë e tij në facebook, jo në foltoren e opozitës. Informacioni më i vlefshëm që jep Tritan Shehu është se pas dhënies me koncension shërbimi i hemodializës nuk i favorizon të sëmurët me cmime më të lira, edhe pse në vendet e Europës cmimet per këtë shërbim kanë rënë.
A është tërhequr kryetari Lulzim Basha nga deklarata e zëdhënëses së tij në 1 gusht të këtij viti ku denoncohej nisja e procedurës për këtë tender? Apo ka ndërruar mendim? Por ka një përgjigje dhe për këtë. Po të shohësh organin zyrtar të PD të datës 1 gusht kuptohet qartë se demokratët kanë qenë të shqetësuar se mos tenderin e fitonte një kompani e drejtuar nga si Bujar G ( http://www.rilindjademokratike.com/index.php?option=com_content&view=article&id=20613:2015-08-01-21-47-01&catid=58:lajme-kyce ). E ndërsa Bujari nuk e fitoi tenderin,PD heshti kur fitues u shpall kompania Evita.
Kjo fitore solli dhe harmoninë mes palëve. Ndërsa PD shfrytezon podiumin e saj për të denoncuar cdo tender të zhvilluar,madje cdo largim nga puna te militantëve të saj,askush nuk kujtohet për një tender miliona dollarësh. Sikur të kthesh vetëm pak kokën pas mund të kujtosh me lehtësi që kjo është hera e dytë e një “bashkepunimi” perfekt mes socialistëve dhe demokratëve. Por cudia më e madhe është që në të dy herët,emri që konsolidon “aleancën ekonomike” është i njëjti. Herën e parë bëhej fjalë për ndërtimin e tregut të ri të produkteve ushqimore dhe zhvendosjen e tregtarëve nga tregu pranë ish uzinës Dinamo. Asokohe edhe pas shumë protestave të tregtarëve të atjeshëm,tregu u prish dhe bekimin për këtë e dha Bashkia e Bashës dhe Qeveria e Ramës. Një vëzhgim i opinion.al konstaton se në regjistrin kombëtar të QKR ,kompania Ekma shpk qe zoteron aksionet e tregut të ri ku tregtarët u cuan forcërisht të ushtrojnë aktivitetin e tyre është në pronësi të Haxhi Bardhit (pronar i tokës) dhe Klodian Allajbeut pronari i njohur i Spitalit Amerikan.
Ky i fundit ka blerë 50 % të aksioneve të Ekma sh.p.k në vitin 2014. Ekstraktet e QKR-së tregojnë qartë që kompania Ekma ka ndërruar aksioner pikërisht në kohën e zhvendosjes së tregut dhe të konsensusit të madh. Është rastësi e gjithë kjo? Ndoshta është. Ndoshta aftësitë tregtare të klientit me fat të të gjitha qeverive janë të tilla që nuk njohin pengesa. Dhe ndoshta këtë aftësi të klientit të tyre,Rama dhe Basha mund ta përdorin apo marrin me qira për të gjetur gjuhën e perbashkët edhe për cështje politike si reforma në drejtësi apo dekriminalizimi. Kur e gjejnë per zhvendosjen e një tregu të madh dhe një tender 86 mln dollarë cdo gjë është e mundur.
