Kongresmeni republikan Lee Zeldin i është drejtuar përmes një shkrese zyrtare Departamentit Amerikan të Shtetit ku kërkon informacione më të detajuara mbi vendimin për shpalljen “non grata” të ish-kryeministrit Sali Berisha.
“ Shtetet e Bashkuara kanë shpallur non-grata ish-Presidentin dhe ish kryeministrin e Shqipërisë Sali Berisha dhe familjen e tij për përfshirjen e tij dhe familjes në korrupsion. Ndaj kësaj mase të marrë nga SHBA, Berisha dhe familja e tij nuk lejohen të udhëtojnë në Shtetet e Bashkuara. Sali Berisha ka histori të marrëdhënieve të shkëlqyera me SHBA-në dhe liderët e saj. Duke marrë shkas gjatë diskutimeve me Sekretarin e Shtetit Antoni Blinken gjatë konferencës së sotme të Komitetit të Marrdhënieve me Jashtë, kërkoj nga ju të njihem me të gjithë informacionin që dispononi si Departament i Shtetit për vendimarrjen tuaj për shpalljen ‘non grata’ të Sali Berishës dhe familjes së tij. Gjithashtu kërkoj informacion të detajuar lidhur me procedurën e ndjekur nga DASH për këtë vendim,” thuhet ndër të tjera në letrën që kongresmeni amerikan i ka dërguar Departamentit Amerikan të Shtetit.
Kjo kërkesë vjen një ditë pasi gjatë një seance të mbajtur onlinë nga Komisioni i Punëve të Jashtme të Kongresit të SHBA, kongresmeni Zeldin i kërkoi Sekretarit Amerikan të Shtetit, informacione specifike për vendimin e marrë ndaj ish-kryeministrit Berisha. Ai po ashtu theksoi se ka bërë dhe vetë hulumtime, por s’ka gjetur se në çfarë afere korruptive mund të ishte përfshirë politikani shqiptar./Opinion.al
