Kreu i Partisë së Lirisë, Ilir Meta ka komentuar Kongresin e Arsimit që po zhvillohet ditën e sotme duke thënë se qeveria nuk mund të mbulojë dështimin dhe nënvleftësimin e arsimit në vendin tonë.
Përmes një postimi në “Facebook”, Meta tha se Shqipëria ka buxhetin më të ulët në rajon sa i përket arsimit, ndërsa shtoi se vazhdon zhvillimi i mësimit me turne, analfabetizmi funksional dhe braktisja e shkollës.
Më tej, Meta shtoi se arritja më e fundit e kryeministrit Rama është kërcënimi ndaj fëmijëve dhe prindërve të tyre për librat e shkollës, referuar fjalës së djeshme në prezantimin e Abetares së përbashkët Kosovë-Shqipëri.
“Me “lart më lart o shokë flamujt e kongresit”, nuk mbulohet dot dështimi dhe nënvleftësimi i plotë i arsimit.
Shqipëria ka buxhetin më të ulët në rajon për arsimin. Vazhdojnë turnet, vazhdon analfabetizmi funksional, vazhdon braktisja e shkollës.
Arritja më e fundit është edhe shantazhi e kërcënimi ndaj fëmijëve dhe prindërve të tyre për librat e shkollës.
Kryeministri i krimit s’mund të jetë i arsimit.
Që të mos vidhen më lekët si te inceneratorët, por të shkojnë për arsim cilësor dhe që t’i krijojnë mundësinë fëmijëve të jetojnë dhe të ndërtojnë të ardhmen e tyre këtu, nesër të gjithë tek inceneratori i Tiranës, ora 18:00.
Pavarësisht këtij fjalimi të bezdisshëm dhe propogandistik të Kryeministrit, i uroj suksese mikeshës sime të vogël Aria dhe gjithë nxënësve të Shqipërisë, veçanërisht të gjithë atyre që sot ulen për herë të parë në bankat e shkollës”, shkruan Meta në Facebook./Opinion.al
