Partia Socialiste ka mbledhur sot kongresin elektoral në Pallatin e Sportit “Ramazan Njala” në Durrës. Sot, PS në pushtet hap fushatën elektorale duke premtuar 220 mijë vende pune dhe duke kërkuar edhe një mandat tjetër qeverisës.
Ndërkohë, Partia Socialiste u ka dërguar një udhëzim të shkurtër, por të përqendruar të gjitha kandidatëve për deputetë ku i udhëzon se cili duhet të jetë komunikimi me elektoratin në funksion në maksimalizimit të votave.
Kongresin e ka hapur deputeti Erjon Braçe, i cili në fjalën e tij theksoi se ndërtimi i Shqipërisë fillon nga Reforma në Drejtësi.
“Shqipëria që kemi sot është një vend pa drejtësi. Reforma në drejtësi është rruga për të ndërtuar një Shqipëri më të drejtë për të gjithë qytetarët”, tha ai.
Më pas e ka marrë fjalën ministri Arben Ahmetaj i cili tha se do të hapim 220 mijë vende pune. “Ne do të luftojmë për cdo vend pune për të rinjtë”, vijoi ai.
Katër vite më parë në fushatën elektorale të 2013, PS deklaronte se në Shqipëri kishte 1 milionë të papunë. Asokohe Rama premtoi se do të hapte 300 mijë vende të reja pune. Ndërkohë që zyrtarisht ministri i Financave Ahmetaj ka deklaruar se për 4 vite kemi punësuar 5 mijë vetë.
Dhe ja ku jemi sot, kur e majta kërkon vota duke premtuar 220 mijë vende të reja pune.
