E shtuna e 23 marsit do t’i gjejë socialistët të mbledhur në Kongresin e tyre të radhës. Një Kongres i rëndësishëm për kohën kur zhvillohet, vetëm 3 muaj përpara zgjedhjeve lokale dhe me krizën politike që ka mbërthyer vendin.
Për këtë Kongres, çdo bashki do të përfaqësohet me 700 deri në 1000 delegatë dhe të ftuar që do të përshkojë bulevardin “Dëshmorët e Kombit” në këmbë për t’ju drejtuar pallatit të Kongreseve (një formë anti-mitingu).
Por këtë “peshën” më të madhe e ka marrë kryebashkiaku Erion Veliaj. Në shumë media është shpërndarë një lajm për ftesën që Veliaj ka bërë për qytetarët e Tiranës. Kryebashkiaku i fton ata të marrin pjesë në takimin e së shtunës që do organizohet në Sheshin “Nënë Tereza”, vetëm disa metra larg Pallatit të Kongreseve, ku do të mbahet mbledhja e socialistëve.
Kjo është një formë për të treguar fuqinë e numrave për mbështetësit që ka qeveria, pas protestave të opozitës. Dhe këtë e tregoi dhe të dielën, kur Veliaj vendosi shtyrjen e festimeve të “Ditës së verës”.
Nga ana tjetër, këtë të martë Veliaj në një intervistë për Top Channel ai tha se ka marrë besimin për një mandat të dytë nga Edi Rama.
“Të jemi të gjithë të shtunën në Kongresin e PS-së, ku ne do të shpallim në publik, jo në salla të mbyllura, kandidaturën për një mandat të dytë të Tiranës, si dhe Këshillit Bashkiak të Tiranës, në orën 11 te sheshi ‘Nënë Tereza’. Është një mënyrë që qyteti ngre kokë dhe më shumë se një përsëritje e Ditës së Verës, në një pranverë të fushatës sonë të dytë”, tha Erion Veliaj ndërsa pati dhe një sfidë për kundërshtarët politikë: “Të vijë Luli, Saliu…të dy bashkë! Të vijë kush të dojë. Por, rëndësi ka të kemi një pjesëmarrje. Qoftë dhe ajo pakicë që e voton ende PD-në, të ketë edhe ajo përfaqësuesit e vet në Këshillin Bashkiak. Sepse unë besoj që gjithmonë duhet një mendim alternativ”./Opinion.al
